ಕಠ್ಮಂಡು, ಜು.24: ನೇಪಾಳ ಕಠ್ಮಂಡುವಿನ ತ್ರಿಭುವನ್ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದಿಂದ ಟೇಕಾಫ್ ಆಗುವಾಗ ಸೌರ್ಯ ಏರ್‌ಲೈನ್ಸ್ ವಿಮಾನ ಪತನಗೊಂಡು ಹದಿನೆಂಟು ಜನರು ಸಾವನ್ನಪ್ಪಿದ್ದಾರೆ. ಈ ದುರಂತ ಬುಧವಾರ ಸಂಭವಿಸಿದೆ.

ಏನಾಗಿತ್ತು?: ಸೌರ್ಯ ಏರ್‌ಲೈನ್ಸ್‌ನ ಸಿಆರ್ ಜೆ7 ವಿಮಾನವು 19 ಜನರೊಂದಿಗೆ ರಿಪೇರಿ ಕೆಲಸಕ್ಕಾಗಿ ಉದ್ಯೋಗಿಗಳು ಮತ್ತು ತಂತ್ರಜ್ಞರೊಂದಿಗೆ ಪೋಖಾರಾಗೆ ಪ್ರಯಣ ಬೆಳೆಸಿತ್ತು. ಸ್ಥಳೀಯ ಕಾಲಮಾನ ಬೆಳಿಗ್ಗೆ 11.11 ಗಂಟೆಗೆ ತಾಂತ್ರಿಕ ಸಿಬ್ಬಂದಿಗಳನ್ನು ಹೊತ್ತು ಪ್ರಯಾಣ ಬೆಳೆಸಿದ ವಿಮಾನ ಬಲಕ್ಕೆ ತಿರುಗಿ ರನ್ ವೇಯ ಪೂರ್ವ ದಿಕ್ಕಿನಲ್ಲಿ ಪತನಗೊಂಡಿತು. ತಕ್ಷಣ ಬೆಂಕಿಯನ್ನು ನಿಯಂತ್ರಣಕ್ಕೆ ತರಲಾಗಿದ್ದರೂ, 18 ಮಂದಿ ಸ್ಥಳದಲ್ಲೇ ಸಾವನ್ನಪ್ಪಿದ್ದರು. ಘಟನೆಯಲ್ಲಿ ಪೈಲಟ್ ಮನೀಷ್ ಶಕ್ಯಾ (37) ಮಾತ್ರ ಬದುಕುಳಿದಿದ್ದು, ಗಾಯಗೊಂಡ ಅವರನ್ನು ಹತ್ತಿರದ ಆಸ್ಪತ್ರೆಗೆ ಕರೆದೊಯ್ಯಲಾಗಿದೆ ಎಂದು ಹಿರಿಯ ಪೊಲೀಸ್ ವರಿಷ್ಠಾಧಿಕಾರಿ (ಎಸ್‌ಎಸ್‌ಪಿ) ದಂಬರ್ ಬಹದ್ದೂರ್ ಮಾಹಿತಿ ನೀಡಿದ್ದಾರೆ.