ಬೆಂಗಳೂರು, ಜ.22: ಬೆಂಗಳೂರಿನ ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಕೆಲಸ ಮಾಡುತ್ತಿರುವ ಸಿಬ್ಬಂದಿ ಕೊರಿಯನ್ ಮಹಿಳೆಯ ಮೇಲೆ ತಪಾಸಣೆ ನೆಪದಲ್ಲಿ ಲೈಂಗಿಕ ದೌರ್ಜನ್ಯ ಎಸಗಿದ ಘಟನೆ ನಡೆದಿದ್ದು, ಮಹಿಳೆಯ ಆರೋಪದ ನಂತರ ಸಿಬ್ಬಂದಿಯನ್ನು ಬಂಧಿಸಲಾಗಿದೆ.

ಜನವರಿ 19, ಸೋಮವಾರ ಕೊರಿಯಾಕ್ಕೆ ತೆರಳುವ ಸಂದರ್ಭದಲ್ಲಿ ತಪಾಸಣೆಗಳನ್ನು ಪೂರ್ಣಗೊಳಿಸಿದ ನಂತರ, ಮಹಿಳೆ ಟರ್ಮಿನಲ್ ಕಡೆಗೆ ಹೋಗುತ್ತಿದ್ದಳು. ಮೊಹಮ್ಮದ್ ಅಫಾನ್ ಎಂದು ಗುರುತಿಸಲಾದ ಸಿಬ್ಬಂದಿ ಅವಳನ್ನು ಸಂಪರ್ಕಿಸಿ ವಿಮಾನ ಟಿಕೆಟ್ ತೋರಿಸಲು ಹೇಳಿದ. ನಂತರ ಅವನು ಚೆಕ್-ಇನ್ ಲಗೇಜ್‌ನಲ್ಲಿ ಸಮಸ್ಯೆ ಇದೆ ಮತ್ತು ಅದು ಬೀಪ್ ಶಬ್ದವನ್ನು ಉಂಟುಮಾಡಿದೆ ಎಂದು ಹೇಳಿದ.

ನಿಯಮಿತ ಸ್ಕ್ರೀನಿಂಗ್ ಕೌಂಟರ್‌ಗೆ ಹಿಂತಿರುಗಲು ಸಮಯ ತೆಗೆದುಕೊಳ್ಳುತ್ತದೆ ಮತ್ತು ವಿಮಾನವ ತಪ್ಪಿ ಹೋಗುವ ಸಾಧ್ಯತೆಯಿದೆ ಎಂದು ಅಫಾನ್ ಅವಳಿಗೆ ಹೇಳಿದ್ದಾನೆ. ಅವಳನ್ನು ಪ್ರತ್ಯೇಕವಾಗಿ ಪರಿಶೀಲಿಸಬೇಕು ಎಂದು ಅವನು ಒತ್ತಾಯಿಸಿ ಪುರುಷರ ಶೌಚಾಲಯದ ಬಳಿಗೆ ಕರೆದೊಯ್ದನು. ಅವಳ ಆಕ್ಷೇಪಣೆಗಳ ಹೊರತಾಗಿಯೂ ಅಫಾನ್ ಅವಳನ್ನು ಅನುಚಿತವಾಗಿ ಸ್ಪರ್ಶಿಸಿದಾಗ ಅವಳು ವಿರೋಧಿಸಿದಳು. ಅವನು ಅವಳನ್ನು ತಬ್ಬಿಕೊಂಡು, “ಧನ್ಯವಾದಗಳು” ಎಂದು ಹೇಳಿ ಹೊರಟು ಹೋದನು.

ಮಹಿಳೆ ತಕ್ಷಣ ಘಟನೆಯನ್ನು ವಿಮಾನ ನಿಲ್ದಾಣದ ಭದ್ರತಾ ಸಿಬ್ಬಂದಿಗೆ ವರದಿ ಮಾಡಿದರು, ಅವರು ಆರೋಪಿಯನ್ನು ವಶಕ್ಕೆ ಪಡೆದು ಪೊಲೀಸರಿಗೆ ಒಪ್ಪಿಸಿದರು. ನಂತರ ಪೊಲೀಸರು ವಿಮಾನ ನಿಲ್ದಾಣದ ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸಿದಾಗ ಅಫಾನ್ ನ ಹೇಯ ಕೃತ್ಯ ಬಯಲಾಗಿದೆ. ಕೊರಿಯನ್ ಮಹಿಳೆಯ ದೂರಿನ ಆಧಾರದ ಮೇಲೆ, ವಿಮಾನ ನಿಲ್ದಾಣದ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ಅಫಾನ್ ನನ್ನು ಬಂಧಿಸಿದ್ದಾರೆ. ಹೆಚ್ಚಿನ ತನಿಖೆ ನಡೆಯುತ್ತಿದೆ.

ಅಫಾನ್ ವಿಮಾನ ನಿಲ್ದಾಣಗಳಲ್ಲಿ ನೆಲ ಮತ್ತು ಸರಕು ಸೇವೆಗಳನ್ನು ಒದಗಿಸುವ ಏರ್ ಇಂಡಿಯಾ ಎಸ್ಎಟಿಎಸ್ ನಲ್ಲಿ ಕೆಲಸ ಮಾಡುತ್ತಿದ್ದ. ಏರ್ ಇಂಡಿಯಾ ಎಸ್ಎಟಿಎಸ್ ಈ ಘಟನೆಯನ್ನು ‘ಕ್ಷಮಿಸಲಾಗದ ಘಟನೆ’ ಎಂದು ವಿವರಿಸಿದೆ ಮತ್ತು ಅಫಾನ್ ನನ್ನು ವಜಾಗೊಳಿಸಿದೆ ಎಂದು ಹೇಳಿದೆ.