ಚೆನ್ನೈ, ಸೆ.19: ಚೆನ್ನೈನ ಎಂಎ ಚಿದಂಬರಂ ಕ್ರೀಡಾಂಗಣದಲ್ಲಿ ಗುರುವಾರ ಆರಂಭವಾದ ಭಾರತ ಮತ್ತು ಬಾಂಗ್ಲಾದೇಶ ನಡುವಿನ ಎರಡು ಪಂದ್ಯಗಳ ಸರಣಿಯ ಮೊದಲ ಟೆಸ್ಟ್‌ನ ಮೊದಲ ದಿನದಂತ್ಯಕ್ಕೆ ಭಾರತ 6 ವಿಕೆಟ್‌ಗೆ 339 ರನ್ ಗಳಿಸಿದೆ. ರವಿಚಂದ್ರನ್ ಅಶ್ವಿನ್ ತಮ್ಮ ಆರನೇ ಟೆಸ್ಟ್ ಶತಕವನ್ನು ಗಳಿಸಿ 102 ರನ್ ಗಳಿಸಿ ಅಜೇಯರಾಗಿದ್ದಾರೆ. ರವೀಂದ್ರ ಜಡೇಜಾ 86 ರನ್ ಗಳಿಸಿ ಅಜೇಯರಾಗುಳಿದರು. ಬಾಂಗ್ಲಾದೇಶ ಪರ ಹಸನ್ ಮಹಮೂದ್ 4 ವಿಕೆಟ್ ಪಡೆದರು. ಇದಕ್ಕೂ ಮೊದಲು ಟಾಸ್ ಗೆದ್ದ ಬಾಂಗ್ಲಾದೇಶ ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡಿತು.

ದಾಖಲೆಯ ಜತೆಯಾಟ: ಆರಂಭಿಕ ಕುಸಿತ ಕಂಡ ಟೀಮ್ ಇಂಡಿಯಾ ನೆರವಿಗೆ ಬಂದಿದ್ದು ಅಶ್ವಿನ್-ಜಡೇಜಾ ಸ್ಪಿನ್ ಜೋಡಿ. 144 ರನ್ ಆಗುವಷ್ಟರಲ್ಲಿ 6 ವಿಕೆಟ್ ಕಳೆದುಕೊಂಡ ಭಾರತ ತಂಡಕ್ಕೆ ಬೆನ್ನೆಲುಬಾಗಿ ನಿಂತ ಅಶ್ವಿನ್-ಜಡೇಜಾ ಜೋಡಿ, ಮುರಿಯದ 7ನೇ ವಿಕೆಟ್ ಗೆ 195 ರನ್ ಗಳ ಜತೆಯಾಟ ನೀಡಿದೆ.

ಸ್ಕೋರ್ ವಿವರ: ಯಶಸ್ವಿ ಜೈಸ್ವಾಲ್ 56, ರೋಹಿತ್ ಶರ್ಮಾ 6. ಗಿಲ್ 0, ಕೊಹ್ಲಿ 6, ರಿಷಬ್ ಪಂತ್ 39, ರಾಹುಲ್ 16.