ಉಡುಪಿ: ಉಡುಪಿ ಸೈಕ್ಲಿಂಗ್ ತಂಡದ ಸದಸ್ಯರು ಡಾ.ಸೈಯದ್ ನೇತೃತ್ವದಲ್ಲಿ ಭಾನುವಾರ ಉಡುಪಿಯಿಂದ ಆಗುಂಬೆಗೆ ಸೈಕಲ್ ರೈಡ್ ಮೂಲಕ ಯುವಜನರಲ್ಲಿ ಆರೋಗ್ಯವಂತ ಜೀವನಶೈಲಿಯ ಬಗ್ಗೆ ಅರಿವನ್ನು ಮೂಡಿಸಿದರು. ಬೆಳಿಗ್ಗೆ 5.30 ಗಂಟೆಗೆ ಕಲ್ಯಾಣಪುರ ಸಂತೆಕಟ್ಟೆ ಜಂಕ್ಷನ್ ನಿಂದ ಆರಂಭಿಸಿದ ಸೈಕಲ್ ಜಾಥಾ, ಕೆಜಿ ರೋಡ್, ಪೆರ್ಡೂರು, ಹೆಬ್ರಿ, ಸೋಮೇಶ್ವರ ಮೂಲಕ ಆಗುಂಬೆ ತಲುಪಿತು.

ಉಡುಪಿ ಸೈಕ್ಲಿಂಗ್ ಕ್ಲಬ್ ನ ಹಿರಿಯ ರೈಡರ್ ಮಾಕ್ಸಿಮ್, ವಿನ್ಸೆಂಟ್ ಡಿ.ಸೋಜ, ದೀಕ್ಷಿತ್, ವಿನಯ್, ರಾಮದಾಸ್ ಪೈ, ಶ್ರೇಯಸ್, ನಿಹಾಲ್, ಅನಂತ್ ಆಚಾರ್ಯ ಮುಂತಾದವರು ಭಾಗವಹಿಸಿದ್ದರು.

ಇಲ್ಲಿಯವರೆಗೆ ಉಡುಪಿ ಸೈಕ್ಲಿಂಗ್ ತಂಡದ ಸದಸ್ಯರು ಸಾರ್ವಜನಿಕರಲ್ಲಿ ಪರಿಸರ ಸಂರಕ್ಷಣೆ, ಇಂಧನ ಉಳಿತಾಯ, ಆರೋಗ್ಯ ಅರಿವು, ಸ್ವಚ್ಛತೆ ಸೇರಿದಂತೆ 15ಕ್ಕಿಂತ ಹೆಚ್ಚು ಸೈಕಲ್ ಜಾಥಾ ಅಭಿಯಾನವನ್ನು ನಡೆಸಿದ್ದಾರೆ.