ಆಂಗ್ಲಾಂಗ್, ಮಾ.6: ಅಸ್ಸಾಂನಲ್ಲಿ, ಜೋರ್ಹತ್ ವಾಯುನೆಲೆಯಿಂದ ಸುಮಾರು 60 ಕಿ.ಮೀ ದೂರದಲ್ಲಿ ನಿಯಮಿತ ತರಬೇತಿ ಕಾರ್ಯಾಚರಣೆಯ ಸಮಯದಲ್ಲಿ ಕಾರ್ಬಿ ಆಂಗ್ಲಾಂಗ್ ಜಿಲ್ಲೆಯ ಬೊಕಾಜನ್ ಉಪ ವಿಭಾಗದ ಇಂಗ್ಲಾಂಗ್ ಎಕೋಪಿ ಬೆಟ್ಟದಲ್ಲಿ ಭಾರತೀಯ ವಾಯುಪಡೆಯ ಸುಖೋಯ್-30MKI ಫೈಟರ್ ಜೆಟ್ ಅಪಘಾತಕ್ಕೀಡಾಗಿ ಇಬ್ಬರು ಪೈಲಟ್ ಗಳು ಮೃತಪಟ್ಟಿದ್ದಾರೆ. ಜೋರ್ಹತ್ ವಾಯುನೆಲೆ 47 ಸ್ಕ್ವಾಡ್ರನ್‌ನಿಂದ ಹೊರಟ ವಿಮಾನವು ಗುರುವಾರ ಸಂಜೆ 7:42 ಕ್ಕೆ ರಾಡಾರ್ ಸಂಪರ್ಕವನ್ನು ಕಳೆದುಕೊಂಡಿತು. ಬೊಕಾಜನ್ ಉಪವಿಭಾಗದ ಚೋಕಿಹೋಲಾ ಗ್ರಾಮದ ಸ್ಥಳೀಯರು ಅಪಘಾತದ ಸ್ಥಳವನ್ನು ಮೊದಲು ಪತ್ತೆಹಚ್ಚಿದರು ಮತ್ತು ಅಪಘಾತಕ್ಕೀಡಾದ ಸ್ಥಳವನ್ನು ತಲುಪಿ ಮೃತ ದೇಹಗಳನ್ನು ಪತ್ತೆಹಚ್ಚಿದರು.

ಅಪಘಾತದಲ್ಲಿ ಸ್ಕ್ವಾಡ್ರನ್ ಲೀಡರ್ ಅನುಜ್ ಮತ್ತು ಫ್ಲೈಟ್ ಲೆಫ್ಟಿನೆಂಟ್ ಪೂರ್ವೇಶ್ ದುರಾಗ್ಕರ್ ಸಾವನ್ನಪ್ಪಿದ್ದಾರೆ. ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಸಂತಾಪ ಸೂಚಿಸಿ, ಅಧಿಕಾರಿಗಳ ಧೈರ್ಯ ಮತ್ತು ಸೇವೆಯನ್ನು ಸದಾ ಸ್ಮರಣೀಯವಾಗಿದೆ. ಈ ದುಃಖದ ಸಮಯದಲ್ಲಿ ದೇಶವು ಮೃತರ ಕುಟುಂಬಗಳೊಂದಿಗೆ ನಿಲ್ಲುತ್ತದೆ ಎಂದು ಸಂತಾಪ ಸೂಚಿಸಿದರು.