ಉಡುಪಿ, ಅ.12: ಮತ್ಸ್ಯಗಂಧ ಮತ್ತು ಸಿಎಸ್‌ಟಿ ರೈಲುಗಳಲ್ಲಿ ಕಳೆದ ಹಲವಾರು ದಶಕಗಳಿಂದ ದೂರಲಾಗುತ್ತಿರುವ ‘ಮತ್ತು’ ಬರಿಸಿ ಪ್ರಯಾಣಿಕರನ್ನು ಲೂಟಿ ಮಾಡುತ್ತಿರುವ ಸತತ ದೂರುಗಳ ಬಗ್ಗೆ ದೆಹಲಿಯ ರೈಲ್ವೇ ಬೋರ್ಡಿನಲ್ಲಿ ಭಾರತೀಯ ರೈಲ್ವೇಯ ರಕ್ಷಣಾ ದಳದ ಮುಖ್ಯಸ್ಥರನ್ನು ಸಂಸದ ಕೋಟ ಶ್ರೀನಿವಾಸ ಪೂಜಾರಿ ಭೇಟಿಯಾಗಿ ಪರಿಹಾರೋಪಯಗಳ ಕುರಿತು ಚರ್ಚೆ ನಡೆಸಿದರು. ಮುಖ್ಯವಾಗಿ, ರೈಲಿನ ಏಸಿ ಕೋಚ್ ಮಾತ್ರವಲ್ಲ ಸ್ಲೀಪರ್ ಕೋಚುಗಳಲ್ಲೂ ಸಿಸಿಟಿವಿ ಅಳವಡಿಕೆ ಮತ್ತು ಇದುವರೆಗೂ ನಡೆದ ಸಂಘಟಿತ ಅಪರಾಧಗಳ ಮಾದರಿಯ ಈ ಎಲ್ಲಾ ದರೋಡೆ ಪ್ರಕರಣಗಳ ತನಿಖೆಗೆ ನಾಲ್ಕು ರಾಜ್ಯಗಳ ಸಹಯೋಗದಲ್ಲಿ ವಿಶೇಷ ತನಿಖಾ ತಂಡ ರಚನೆಯ ಕುರಿತು ಚರ್ಚಿಸಲಾಯಿತು. ಸಂಸದರ ಜತೆ ವಿಷಯಗಳನ್ನು ವಿವರವಾಗಿ ಚರ್ಚಿಸಿದ ಸುರಕ್ಷತಾ ಮಹಾನಿರ್ದೇಶಕಿ ಸೋನಿಯಾ ಶರ್ಮಾ ರವರು ಇದುವರೆಗಿನ ಅಪರಾದಗಳ ಸಮಗ್ರ ತನಿಖೆಗೆ ಹಿರಿಯ ಅಧಿಕಾರಿಗಳಿಗೆ ಸ್ಥಳದಲ್ಲೇ ಸೂಚಿಸಿದರು.

ರೈಲುಗಳ ಕೋಚ್ ಗಳಿಗೆ ಸಿಸಿಟಿವಿ ಅಳವಡಿಕೆಗೆ ರೈಲು ಮಂಡಳಿಯ ಸೂಚನೆಗಾಗಿ ಮುಂದಿನ ಸಭೆಯಲ್ಲಿ ಈ ವಿಷಯ ಪ್ರಸ್ತುತಪಡಿಸುವುದಾಗಿಯೂ ತಿಳಿಸಿದರು. ಇದು ಅತ್ಯಂತ ಗಂಭೀರ ಹಾಗೂ ಪ್ರಯಾಣಿಕರ ಸುರಕ್ಷತೆಯ ವಿಷಯವೂ ಆಗಿದ್ದು ಇದನ್ನು ತಾರ್ಕಿಕ ಅಂತ್ಯದತ್ತ ಕೊಂಡೊಯ್ಯಲು ಮುಂದಿನ ವಾರ ರೈಲು ಸಚಿವರನ್ನೂ ಈ ಕುರಿತು ಭೇಟಿಯಾಗಿ ಚರ್ಚಿಸಲಾಗುವುದು ಎಂದು ಸಂಸದ ಕೋಟ ಶ್ರೀನಿವಾಸ ಪೂಜಾರಿ ಹೇಳಿದ್ದಾರೆ.