ಬೆಂಗಳೂರು: ಸ್ವತಃ ಕಛೇರಿಯ ಲ್ಯಾಪ್ಟಾಪ್ ಕದ್ದು ಐಟಿ ಕಂಪನಿಯೊಂದರ ಮೂವರು ಉದ್ಯೋಗಿಗಳು ಈಗ ಕಂಬಿ ಎಣಿಸುತ್ತಿದ್ದಾರೆ.
ಹಣದ ದಾಹಕ್ಕೆ ಇವರು ಕದ್ದದ್ದು ಬರೋಬ್ಬರಿ 1070 ಲ್ಯಾಪ್ಟಾಪ್ಗಳು. ಕದ್ದ ಲ್ಯಾಪ್ಟಾಪ್ ಗಳನ್ನು ಕಡಿಮೆ ಹಣಕ್ಕೆ ಮಾರಿ ಅನ್ನ ನೀಡಿದ ಕಂಪನಿಗೆ ಧ್ರೋಹ ಬಗೆದ ಐಟಿ ಉದ್ಯೋಗಿಗಳಾದ ಜಗದೀಶ್ ಟಿ.ಎಸ್., ಲೋಕೇಶ್, ಸುರೇಶ್ ಕೆ.ಎಮ್ ರನ್ನು ಬೆಂಗಳುರು ನಗರ ಪೊಲೀಸರು ಬಂಧಿಸಿ ತನಿಖೆ ನಡೆಸುತ್ತಿದ್ದಾರೆ.
ಕಂಪನಿಯಲ್ಲಿ ನೂತನವಾಗಿ ಉದ್ಯೋಗವನ್ನು ಪಡೆದವರಿಗೆ ವಿತರಿಸಲು ಇರಿಸಿದ ಲ್ಯಾಪ್ಟಾಪ್ ಗಳನ್ನು ಮೂವರು ಆಗಾಗ್ಗೆ ಕೊಠಡಿಯೊಳಗೆ ಪ್ರವೇಶಿಸಿ ಸಿಸಿಟಿವಿ ಬಂದ್ ಮಾಡಿ ಕಳವು ಮಾಡಿದನ್ನು ಭದ್ರತಾ ಸಿಬ್ಬಂದಿ ನೋಡಿ ಕಂಪನಿಯ ಆಡಳಿತ ಮಂಡಳಿಗೆ ಮಾಹಿತಿ ನೀಡಿದ ನಂತರ ಆಡಳಿತ ಮಂಡಳಿ ಪೊಲೀಸರಿಗೆ ದೂರು ನೀಡಿದ್ದರು.
ತಕ್ಷಣ ಕಾರ್ಯಪ್ರವೃತ್ತರಾದ ಪೊಲೀಸರು ಮೂವರು ಆರೋಪಿಗಳಿಗೆ ಬಲೆ ಬೀಸಿ ಕೆಲವೇ ದಿನಗಳಲ್ಲಿ ಬಂಧಿಸಿದ್ದಾರೆ.
