ಮಣಿಪಾಲ: ಮಕ್ಕಳೊಂದಿಗೆ ಮಗುವಾಗಿ, ಮಿತ್ರನಾಗಿ, ಸಮಾನನಾಗಿ, ಸಮನ್ವಯಕಾರನಾಗಿ, ಸಮಸ್ಯೆಗಳ ಪರಿಹಾರಕನಾಗಿ ಗುರು ದುಡಿದರೆ ತನ್ನ ಶಿಷ್ಯನಲ್ಲಿ ಅಡಗಿರುವ ಪ್ರತಿಭೆಯನ್ನು ಅರಳಿಸಬಹುದು.
ಗುರುತ್ವ ಗುರುತರ ಜವಾಬ್ದಾರಿಯನ್ನು ಹೊಂದಿರುವ ಸ್ಥಾನ. ಪ್ರಪಂಚದ ಆಗುಹೋಗುಗಳ ಸ್ಪಷ್ಟೀಕರಣ ಕೊಡುವ, ಸತ್ಯವನ್ನು ಹುಡುಕುವ ಪ್ರಯತ್ನ ಮತ್ತು ಉತ್ಸಾಹವನ್ನು ವಿದ್ಯಾರ್ಥಿಗಳಲ್ಲಿ ಬೆಳೆಸುವುದು ಆತನ ಆದ್ಯ ಕರ್ತವ್ಯ.
ಅಸಾಧ್ಯವಾದುದರ ಸಾಧಿಸುವ ಛಲವು ಬೆಳವಣಿಗೆಗೆ ಮಾರಕವಾಗಬಹುದು. ಸಾಧ್ಯವಿರುವ ಗುರಿಯಡೆಗೆ ಸ್ಪಷ್ಟತೆ ಮತ್ತು ಸಿದ್ಧತೆ ಮಾಡಿಕೊಡುವ ಕೌಶಲ್ಯ ಗುರುವಿಗಿರಬೇಕಾಗುತ್ತದೆ ಎಂದು ಕಂಪ್ಯೂಟರ್ ವಿಜ್ಞಾನಿ ಫ್ರೊ. ಕೆ.ವಿ.ರಾವ್ ಹೇಳಿದರು.
ರೋಟರಿ ಕ್ಲಬ್ ಮಣಿಪಾಲ ಟೌನ್ ಇದರಿಂದ ನಡೆದ ಗುರುಪೂರ್ಣಿಮಾ ದಿನಾಚರಣೆಯ ಮುಖ್ಯ ಅತಿಥಿಯಾಗಿ ಅವರು ಮಾತನಾಡಿದರು.
ಸಾವಿರಾರು ಜ್ಞಾನದಾಹಿಗಳಿಗೆ ಗುರುವಾಗಿ, ಗಣಕಯಂತ್ರದ ಭಾರತೀಯ ಭಾಷೆಗಳ ಕೀಲೀಮಣೆಯ ಪಿತಾಮಹನೆಂದು ಕರೆಯಲ್ಪಡುವ ಫ್ರೊ. ಕೆ.ವಿ.ರಾವ್ ಇವರನ್ನು ಸಂಸ್ಥೆಯ ವತಿಯಿಂದ ಗೌರವಿಸಲಾಯಿತು.
ಸಭೆಯ ಅಧ್ಯಕ್ಷತೆಯನ್ನು ನಿತ್ಯಾನಂದ ನಾಯಕ್ ಅವರು ವಹಿಸಿದ್ದರು.
ಸಚ್ಚಿದಾನಂದ ವಿ. ನಾಯಕ್ ಅತಿಥಿಗಳನ್ನು ಪರಿಚಯಿಸಿದರು. ಮಣಿಪಾಲ ಹಿಲ್ಸ್ ರೋಟರಿ ಅಧ್ಯಕ್ಷೆ ಸವಿತಾ ಭಟ್ ಉಪಸ್ಥಿತರಿದ್ದರು. ದೀಪಕರಾಮ್ ಬಾಯರಿ ವಂದಿಸಿದರು.
