ಕೋಟ, ಮಾ.21: ಸ್ನೇಹಕೂಟ ಮಣೂರು ಇಲ್ಲಿನ ಸದಸ್ಯರು ಮಂಗಳವಾರ ಚೈತನ್ಯ ವಿಶೇಷ ಚೇತನ ಮಕ್ಕಳ ಶಾಲೆ ಕುಂದಾಪುರ ಇಲ್ಲಿ ಮಹಿಳಾ ದಿನಾಚರಣೆಯನ್ನು ವಿಶಿಷ್ಟ ರೀತಿಯಲ್ಲಿ ಆಚರಿಸಿದರು. ಈ ವೇಳೆ ಮಾತನಾಡಿದ ಚೈತನ್ಯ ವಿಶೇಷ ಚೇತನ ಮಕ್ಕಳ ಶಾಲೆಯ ಅಧ್ಯಕ್ಷೆ ಲೀಲಾವತಿ ಕರ್ಕಡ, ವಿಶೇಷ ಚೇತನರ ಬಗ್ಗೆ ಮಾಹಿತಿ ಪಡೆದು ಆಗಮಿಸಿ ಇಲ್ಲಿನ ಮಕ್ಕಳು ಹಾಗೂ ತಾಯಂದಿರರ ಜತೆ ಸಂಭ್ರಮಿಸಿದ ಕಾರ್ಯಕ್ರಮ ನಿಜಕ್ಕೂ ಅರ್ಥಪೂರ್ಣ. ಪ್ರಸ್ತುತ ವಿದ್ಯಾಮಾನದಲ್ಲಿ ಇಂಥಹ ಮಕ್ಕಳ ಬಗ್ಗೆ ಕಾಳಜಿ ವಹಿಸಿ ಸಮಾಜಮುಖಿ ಕಾರ್ಯಗಳನ್ನು ನೀಡುವ ಸ್ನೇಹಕೂಟಕ್ಕೆ ಕೃತಜ್ಞತೆ ಸಲ್ಲಿಸಿದರು. ಮಕ್ಕಳಿಗೆ ಅವಶ್ಯವಿರುವ ಸ್ಪೋರ್ಟ್ಸ್ ಟೀ ಶರ್ಟ್ಗಳನ್ನು ಸಂಘದ ವತಿಯಿಂದ ಸ್ನೇಹಕೂಟದ ವಿಷ್ಣುಮೂರ್ತಿ ಮಯ್ಯ ಹಸ್ತಾಂತರಿಸಿದರು. ಸ್ನೇಹಕೂಟ ಮಣೂರು ಇದರ ಸಂಚಾಲಕಿ ಭಾರತಿ ವಿ .ಮಯ್ಯ ಬಹುಮಾನ ವಿತರಿಸಿದರು. ಸಭೆಯಲ್ಲಿ ಸ್ನೇಹಕೂಟದ ಸ್ಥಾಪಕ ಸದಸ್ಯೆ ಮಹಾಲಕ್ಷ್ಮಿ ಉರಾಳ, ಹಿರಿಯ ಸದಸ್ಯರಾದ ಸಾವಿತ್ರಿ ಮಯ್ಯ ಹಾಗೂ ಸ್ನೇಹಕೂಟದ ಸದಸ್ಯರು ಉಪಸ್ಥಿತರಿದ್ದರು. ಸುಜಾತ ಬಾಯರಿ ಕಾರ್ಯಕ್ರಮ ನಿರೂಪಿಸಿದರು.