ಉಡುಪಿ, ಜ.7: ರಾಯಚೂರು ಜಿಲ್ಲೆಯ ಸಿಂಧನೂರು ತಾಲೂಕಿನ ರೋಡ್ಕುಂದ ಗ್ರಾಮದಲ್ಲಿನ ಅಪ್ರಕಟಿತ ಶಾಸನವನ್ನು ಇತಿಹಾಸ ಮತ್ತು ಪುರಾತತ್ವ ಸಂಶೋಧನಾರ್ಥಿಗಳಾದ ಹೆಚ್. ಕಾಡಸಿದ್ದ ಮತ್ತು ಹೊನ್ನರವಲಿ ಪತ್ತೆ ಮಾಡಿದ್ದು, ಈ ಶಾಸನವನ್ನು ಓದುವಲ್ಲಿ ಎಸ್. ನಾಗರಾಜಪ್ಪ (ಮೈಸೂರಿನ ಭಾರತೀಯ ಪುರಾತತ್ವ ಸರ್ವೇಕ್ಷಣಾ ಇಲಾಖೆಯ ಶಾಸನತಜ್ಞ), ಮಂದರ್ಕೆ ನಿತ್ಯಾನಂದ ಪೈ (ಭಾರತೀಯ ನಾಣ್ಯಶಾಸ್ತ್ರಜ್ಞ) ಹಾಗೂ ಶ್ರುತೇಶ್ ಆಚಾರ್ಯ ಮೂಡುಬೆಳ್ಳೆ ಸಹಕಾರ ನೀಡಿರುತ್ತಾರೆ.

ಸ್ವಸ್ತಿಶ್ರೀ ಎಂಬ ಶುಭಸೂಚಕದಿಂದ ಪ್ರಾರಂಭವಾಗುವ ಈ ಶಾಸನವನ್ನು 8ನೆಯ ಶತಮಾನದ ಕನ್ನಡ ಲಿಪಿ ಮತ್ತು ಭಾಷೆಯಲ್ಲಿ ಬರೆಯಲಾಗಿದ್ದು, 5 ಸಾಲುಗಳನ್ನು ಒಳಗೊಂಡಿದೆ.

ಶಾಸನದ ಮಹತ್ವ: ಬಾದಾಮಿ ಚಾಲುಕ್ಯ ದೊರೆ ಇಮ್ಮಡಿ ಕೀರ್ತಿವರ್ಮನ ಆಳ್ವಿಕೆಯಲ್ಲಿ (ಸಾ.ಶ.ವ 744-757) ಪ್ರಾಯಶಃ ಮಗೆಯರ ಕುಲಕ್ಕೆ ಸೇರಿದ ಬಿಜಕಾರಿ ಎಂಬುವವನು ಸಾಲಿಗುನ್ದೆ (ಪ್ರಸ್ತುತ ಸಾಲುಗುಂದ) ಗ್ರಾಮವನ್ನು ವಶಪಡಿಸಿಕೊಳ್ಳುವ ಸಂದರ್ಭದಲ್ಲಿ ಗೆದ್ದು, ಸತ್ತ ವಿಷಯವನ್ನು ಶಾಸನವು ತಿಳಿಸುತ್ತದೆ. ರೋಡ್ಕುಂದ ಗ್ರಾಮದಲ್ಲಿ ಬಾದಾಮಿ‌ ಚಾಲುಕ್ಯ ಇಮ್ಮಡಿ ಕೀರ್ತಿವರ್ಮನ ಉಲ್ಲೇಖವಿರುವ ಪ್ರಥಮ ಶಾಸನ ಇದಾಗಿದೆ.