ಉಡುಪಿ, ಸೆ.21: ಉಪ್ಪೂರು ಕುದ್ರುಬೆಟ್ಟುವಿನಲ್ಲಿ ಹರಿಯುವ ಸುವರ್ಣ ನದಿಯಲ್ಲಿ ಧುಮುಕಿ ಆತ್ಮಹತ್ಯೆಗೆ ಮುಂದಾಗಿದ್ದ ಹೊರ ರಾಜ್ಯದ ಯುವಕನನ್ನು ಸ್ಥಳೀಯರು ಹಾಗೂ ಸಮಾಜಸೇವಕ ನಿತ್ಯಾನಂದ ಒಳಕಾಡು ರಕ್ಷಿಸಿರುವ ಘಟನೆ ಬುಧವಾರ ನಡೆದಿದೆ. ರಕ್ಷಿಸಲ್ಪಟ್ಟ ಯುವಕ ತಮಿಳುನಾಡಿನ ಧರ್ಮಪುರಿ ಜಿಲ್ಲೆಯ ಸುಮನ್ (40) ಎನ್ನಲಾಗಿದೆ. ಯುವಕನ ಸಂಬಂಧಿಕರು ಇದ್ದಲ್ಲಿ ಕಾರ್ಕಳದ ಹೊಸಬೆಳಕು ಆಶ್ರಮವನ್ನು ಸಂಪರ್ಕಿಸಲು ಸೂಚಿಸಲಾಗಿದೆ.

ಕಾರ್ಯಾಚರಣೆಯಲ್ಲಿ ಲೋಕೇಶ್ ಮೆಂಡನ್, ಸುಜಿ ಮೆಂಡನ್, ಅರವಿಂದ ಮೆಂಡನ್, ಉಮೇಶ ಜತ್ತನ್ನ, ಪ್ರದೀಪ ಮೆಂಡನ್, ಸುರೇಶ್ ಬಿ. ಆರ್ ಭಾಗಿಯಾಗಿದ್ದರು. ಯುವಕ ಮಾನಸಿಕ ಖಿನ್ನತೆಗೆ ಒಳಗಾಗಿ ಆತ್ಮಹತ್ಯೆ ಕೃತ್ಯ ನಡೆಸಲು ಮುಂದಾಗಿರುವುದು ಕಂಡುಬಂದಿದೆ. ರಕ್ಷಿಸಲ್ಪಟ್ಟ ಯುವಕನ ಮನವೊಲಿಸಿದ ಸಮಾಜಸೇವಕ ಒಳಕಾಡು ಕಾರ್ಕಳದ ಹೊಸಬೆಳಕು ಆಶ್ರಮದಲ್ಲಿ ಆಶ್ರಯ ಒದಗಿಸಿದ್ದಾರೆ. ಆಶ್ರಮದ ಸಂಚಾಲಕರಾದ ವಿನಯಚಂದ್ರ ಸಾಸ್ತಾನ, ತನುಲಾ ತರುಣ್, ಗೌರೀಶ್ ಅವರು ಅಸಹಾಯಕ ಯುವಕನಿಗೆ ಆಶ್ರಯ ನೀಡಲು ನೆರವಾಗಿದ್ದಾರೆ.