ನಾಗಪುರ, ಮಾ.17: 2021 ರಿಂದ ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಸರಕಾರ್ಯವಾಹ (ಪ್ರಧಾನ ಕಾರ್ಯದರ್ಶಿ) ಆಗಿದ್ದ ದತ್ತಾತ್ರೇಯ ಹೊಸಬಾಳೆ ಅವರನ್ನು ಅಖಿಲ ಭಾರತೀಯ ಪ್ರತಿನಿಧಿ ಸಭಾ 2024 ರಿಂದ 2027 ರವರೆಗೆ ಮೂರು ವರ್ಷಗಳ ಕಾಲ ಆರ್.ಎಸ್.ಎಸ್. ಪ್ರಧಾನ ಕಾರ್ಯದರ್ಶಿಯಾಗಿ ಪುನರಾಯ್ಕೆ ಮಾಡಿದೆ. ಬಳಿಕ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು, ಸಂಘವು ಜನಮನದಾಳಕ್ಕೆ ಹೋಗುತ್ತಿದ್ದು, ಸಮಾಜದಲ್ಲಿಯೂ ಸಂಘದ ಪ್ರಭಾವ ಹೆಚ್ಚುತ್ತಿದೆ. ರಾಮಲಲ್ಲಾ ಪ್ರಾಣ ಪ್ರತಿಷ್ಠೆಯ ಮೊದಲು ‘ಅಕ್ಷತ್ ವಿತರಣಾ’ ಸಮಯದಲ್ಲಿ ದೇಶಾದ್ಯಂತ ಜನರು ನಮ್ಮನ್ನು ಸ್ವಾಗತಿಸಿದ ರೀತಿ ದೇಶದ ವಾತಾವರಣವನ್ನು ತೋರಿಸುತ್ತದೆ.

ರಾಮಮಂದಿರವು ಭಾರತದ ನಾಗರಿಕತೆ ಮತ್ತು ಅದರ ಸಂಸ್ಕೃತಿಯ ಸಂಕೇತವಾಗಿದೆ. ಶ್ರೀರಾಮ ದೇಶದ ನಾಗರಿಕತೆಯ ಗುರುತು, ಇದು ಮತ್ತೆ ಮತ್ತೆ ಸಾಬೀತಾಗಿದೆ ಮತ್ತು ಜನವರಿ 22 ರಂದು ಸಾಬೀತಾಗಿದೆ. ಸರಿಸುಮಾರು 20 ಕೋಟಿ ಮನೆಗಳನ್ನು ಆರ್‌ಎಸ್‌ಎಸ್ ಅಥವಾ ನಮ್ಮ ಸಿದ್ಧಾಂತ ಹೊಂದಿರುವ ಜನರು ತಲುಪಿದ್ದಾರೆ, ಇದು ಭಾರತದ ಇತಿಹಾಸದಲ್ಲಿ ದಾಖಲೆಯಾಗಿದೆ. ಕೇವಲ 15 ದಿನಗಳಲ್ಲಿ ಇದು ಸಾಧ್ಯವಾಗಿದೆ ಎಂದು ದತ್ತಾತ್ರೇಯ ಹೊಸಬಾಳೆ ಹೇಳಿದರು.