ಬೆಂಗಳೂರು: ಡಾ. ಪುನೀತ ರಾಜಕುಮಾರ್ ಗೆ ಮರಣೋತ್ತರ ಕರ್ನಾಟಕ ರತ್ನ ಪ್ರಶಸ್ತಿ ಪ್ರದಾನ ಸಮಾರಂಭ ವಿಧಾನಸೌಧದ ಮುಂಭಾಗದಲ್ಲಿ ಸುರಿಯುವ ಮಳೆಯ ನಡುವೆಯೇ ನಡೆಯಿತು. ಪ್ರಶಸ್ತಿಯನ್ನು ಪುನೀತ್ ರಾಜಕುಮಾರ್ ಅವರ ಪತ್ನಿ ಅಶ್ವಿನಿ ಪುನೀತ್ ರಾಜಕುಮಾರ್ ಸ್ವೀಕರಿಸಿ ಭಾವುಕರಾಗಿ ಸರಕಾರಕ್ಕೆ ಕೃತಜ್ಞತೆ ಸಲ್ಲಿಸಿದರು.

ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಮಾತನಾಡುತ್ತಾ, ಕರ್ನಾಟಕ ರತ್ನವಾಗಿ ಅಪ್ಪು ಅಮರರಾಗಿದ್ದಾರೆ. ಪುನೀತ್ ಅವರ ಸರಳತೆ, ಸಾಮಾಜಿಕ ಕಳಕಳಿಯಿಂದ ಕೂಡಿದ ಕಾರ್ಯಗಳು ನಮಗೆಲ್ಲರಿಗೂ ಸದಾ ಸ್ಪೂರ್ತಿಯಾಗಿದೆ. ಸಂಪೂರ್ಣ ಕರ್ನಾಟಕವೇ ಈ ದಿನವನ್ನು ಸಂಭ್ರಮಿಸುತ್ತಿರುವುದು ಪುನೀತ್ ರಾಜಕುಮಾರ್ ರವರಿಗಿದ್ದ ಜನಪ್ರಿಯತೆಯ ದ್ಯೋತಕವಾಗಿದೆ. ಪುನೀತ್ ರಾಜಕುಮಾರ್ ಮತ್ತೊಮ್ಮೆ ಈ ನಾಡಿನಲ್ಲಿ ಹುಟ್ಟಿ ಬರಲಿ ಎಂದರು.

ಸುಧಾಮೂರ್ತಿ, ನಟ ರಜಿನಿಕಾಂತ್, ಜ್ಯೂ. ಎನ್.ಟಿ.ಆರ್, ಸಚಿವರುಗಳಾದ ಸುನಿಲ್ ಕುಮಾರ್, ಆರ್ ಅಶೋಕ್, ಡಾ. ಸುಧಾಕರ್, ಡಾ. ಅಶ್ವತ್ಥನಾರಾಯಣ, ನಟ ಶಿವರಾಜಕುಮಾರ್ ಮೊದಲಾದವರು ಉಪಸ್ಥಿತರಿದ್ದರು.