ಉಡುಪಿ, ಮೇ 12: ಉಡುಪಿ ಜಿಲ್ಲೆಯಾದ್ಯಂತ ಗುರುವಾರ ಸುರಿದ ಮಳೆಗೆ ಕೆಲವೆಡೆ ಹಾನಿಯುಂಟಾಗಿದೆ. ಉಡುಪಿಯ ಪೆರ್ಡೂರು ಗ್ರಾಮದ ಶಾಲಿನಿ, ಸುಗಂಧಿ, ಗುಲಾಬಿ ಎಂಬವರ ಮನೆಯ ಮೇಲೆ ಮರಬಿದ್ದು ಭಾಗಶಃ ಹಾನಿಯಾಗಿದೆ. ಕಾಪು ತಾಲೂಕಿನ ಪಡು ಗ್ರಾಮದ ವಿಜಯ ಕೋಟ್ಯಾನ್ ಎಂಬವರ ಮನೆಯ ಮೇಲೆ ಮರಬಿದ್ದು ಭಾಗಶಃ ಹಾನಿಯಾಗಿದೆ.

ಬ್ರಹ್ಮಾವರ ತಾಲೂಕಿನ ಆರೂರಿನ ಕಾವೇರಿ ಎಂಬವರ ಮನೆಯ ಮೇಲೆ ಗಾಳಿ ಮಳೆಯಿಂದ ಮರಬಿದ್ದು ಭಾಗಶಃ ಹಾನಿಯಾಗಿದೆ. ಕಾರ್ಕಳದ ಕೌಡೂರು ಗ್ರಾಮದ ಕೇಶವ ಶೆಟ್ಟಿ ಎಂಬವರ ಮನೆಗೆ ಸಿಡಿಲು ಬಡಿದು ಭಾಗಶಃ ಹಾನಿಯಾಗಿದೆ. ಉಡುಪಿಯ ಬೆಳ್ಳಂಪಳ್ಳಿ ರಮಣಿ ಎಂಬವರ ಮನೆಯ ಮೇಲೆ ಮರಬಿದ್ದು ಭಾಗಶಃ ಹಾನಿಯಾಗಿದೆ. ಉಡುಪಿಯ 41 ಶಿರೂರು ಗ್ರಾಮದ ಅಪ್ಪಿ ಶೇರಿಗಾರ್ತಿ ಮನೆಯ ಮೇಲೆ ಗಾಳಿ ಮಳೆಯಿಂದ ಮರಬಿದ್ದು ಭಾಗಶಃ ಹಾನಿಯಾಗಿದೆ. ಉಡುಪಿಯಲ್ಲಿ 44.1 ಮಿಮೀ, ಬ್ರಹ್ಮಾವರದಲ್ಲಿ 11.2, ಕಾಪು-44.6, ಕಾರ್ಕಳ- 12.7, ಹೆಬ್ರಿ- 9.4 ಮಿಮೀ ಮಳೆಯಾಗಿದೆ.

ಉಡುಪಿ ಜಿಲ್ಲೆಯ ಕಾಪು ತಾಲೂಕಿನಲ್ಲಿ ಗುರುವಾರ ರಾತ್ರಿ ಸುರಿದ ಗಾಳಿ ಮಳೆಗೆ ಕಾಪು ತಾಲೂಕು ಮಲ್ಲಾರು ಗ್ರಾಮದ ಸ್ವಾಗತ್ ನಗರ ಎಂಬಲ್ಲಿ ಚಲಿಸುತ್ತಿದ್ದ ರಿಕ್ಷಾದ ಮೇಲೆ ಬೃಹತ್ ಮರ ಬಿದ್ದು ರಿಕ್ಷಾದಲ್ಲಿ ಪ್ರಯಾಣಿಸುತ್ತಿದ್ದ ಪಾದೂರು ಗ್ರಾಮದ ನಿವಾಸಿ ಪುಷ್ಪಾ (49) ಹಾಗೂ 108 ಕಳತ್ತೂರು ಗ್ರಾಮದ ಕೃಷ್ಣ ಮುಖಾರಿ (53) ಎಂಬವರು ಮೃತಪಟ್ಟಿರುತ್ತಾರೆ.