ಉಡುಪಿ: ರೋಟರಿ ವಲಯ 4ರ ಸುಮಾರು 20ಕ್ಲಬ್ ಗಳ ಇಂಟರಾಕ್ಟ ಸದಸ್ಯರಿಗೆ ಅಂಬಲಪಾಡಿ ದೇವಳದ ಭವಾನಿ ಮಂಟಪದಲ್ಲಿ ಒಂದು ದಿನದ ಭೌತಿಕ ವಿಕಸನ ಕಾರ್ಯಗಾರ ನಡೆಯಿತು. ಉದ್ಘಾಟನಾ ಕಾರ್ಯಕ್ರಮದಲ್ಲಿ ಧರ್ಮದರ್ಶಿ ಡಾ. ನಿ.ಬಿ. ವಿಜಯ ಬಲ್ಲಾಳರು ಮಾತನಾಡುತ್ತಾ, ಶ್ರೀ ದೇವಿಯ ಆವರಣದಲ್ಲಿ ಮಕ್ಕಳಿಗೆ ನಡೆಸುವ ಇಂತಹ ಕಾರ್ಯಾಗಾರಗಳು ಅದ್ಭುತ ಪರಿಣಾಮವನ್ನುಂಟು ಮಾಡುತ್ತವೆ.

ಜಗತ್ತಿನಲ್ಲಿ ಪೋಲಿಯೊ ನಿರ್ಮೂಲನೆಯಲ್ಲಿ ಮಹತ್ವದ ಪಾತ್ರ ವಹಿಸಿದ ರೋಟರಿಯು, ವಿದ್ಯಾರ್ಥಿಗಳಿಗೆ ಉಪಯುಕ್ತವಾದ ಇಂತಹ ಕಾರ್ಯಕ್ರಮವನ್ನು ಏರ್ಪಡಿಸಿದ್ದು ಅಭಿನಂದನೀಯ ಮತ್ತು ಇದರ ಸಂಪೂರ್ಣ ಉಪಯೋಗ ಪಡೆಯಿರೆಂದು ಕರೆನೀಡಿ, ಕಾರ್ಯಕ್ರಮಕ್ಕೆ ಶುಭ ಹಾರೈಸಿದರು.

ಸಂಪನ್ಮೂಲ ಅತಿಥಿಗಳಾಗಿ ಡಯಟ್ ನ ಉಪಪ್ರಾಂಶುಪಾಲ ಡಾ. ಅಶೋಕ ಕಾಮತ್, ಕೆಎಂಸಿ ಮಣಿಪಾಲದ ಡಾ. ಅಶ್ವಿನಿ ಕುಮಾರ್, ಡಯಟ್ ನ ಪ್ರಾಧ್ಯಾಪಕ ಯೋಗನರಸಿಂಹ, ಮನಃಶಾಸ್ತ್ರಜ್ಞ ಡಾ. ವಿರೂಪಾಕ್ಷ ದೇವರಮನೆ, ಕೋಟ ವಿವೇಕ ಪದವಿಪೂರ್ವ ಕಾಲೇಜಿನ ನರೇಂದ್ರ ಕುಮಾರ್ ಮಾಅರ್ಗದರ್ಶನ ನೀಡಿದರು.

ಯುವಸೇವಾ ನಿರ್ದೇಶಕ ಜನಾರ್ದನ ಭಟ್, ಇಂಟರಾಕ್ಟ ಸಭಾಪತಿ ಪದ್ಮಿನಿ ಭಟ್ ಮತ್ತು ಇತರ ರೋಟರಿ ಸದಸ್ಯರು ಉಪಸ್ಥಿತರಿದ್ದರು. ಸಹಾಯಕ ಗವರ್ನರ್ ರಾಮಚಂದ್ರ ಉಪಾಧ್ಯಾಯ ಪ್ರಾಸ್ತಾವಿಕವಾಗಿ ಮಾತನಾಡಿದರು. ರೋಟರಿ ಅಧ್ಯಕ್ಷ ಸುಬ್ರಹ್ಮಣ್ಯ ಕಾರಂತ ಸ್ವಾಗತಿಸಿ, ಕಾರ್ಯದರ್ಶಿ ಗುರುರಾಜ್ ಭಟ್ ವಂದಿಸಿದರು. ಅನಂತರಾಮ ಬಲ್ಲಾಳ ಕಾರ್ಯಕ್ರಮ ನಿರೂಪಿಸಿದರು.