ಓವಲ್: ಇಂಗ್ಲೆಂಡ್ ವಿರುದ್ಧ ನಾಲ್ಕನೇ ಟೆಸ್ಟ್ ನಲ್ಲಿ ಭಾರತ 157 ರನ್ನುಗಳ ಭರ್ಜರಿ ಗೆಲುವನ್ನು ಸಾಧಿಸುವ ಮೂಲಕ ಸರಣಿಯಲ್ಲಿ 2-1 ಮುನ್ನಡೆ ಕಾಯ್ದುಕೊಂಡಿದೆ. ಐದನೇ ದಿನವಾದ ಇಂದು ಇಂಗ್ಲೆಂಡ್ 100 ರನ್ ಗಳಿಸುವಷ್ಟರಲ್ಲಿ ಶಾರ್ದುಲ್ ಠಾಕೂರ್ ಮೊದಲ ಆಘಾತ ನೀಡಿದರು.

ಆರಂಭಿಕ ಬರ್ನ್ಸ್-ಹಮೀದ್ ಜೋಡಿ ಅರ್ಧಶತಕದ ಮೂಲಕ ಇಂಗ್ಲೆಂಡ್ ತಂಡಕ್ಕೆ ಭರವಸೆಯನ್ನು ನೀಡಿದರೂ ಈ ಜೋಡಿ ಹೆಚ್ಚು ಹೊತ್ತು ಕ್ರೀಸ್ ನಲ್ಲಿ ಉಳಿಯಲಿಲ್ಲ. ಬರ್ನ್ಸ್ 50 ಗಳಿಸಿದರೆ ಹಮೀದ್ 63 ರನ್ ಹೊಡೆದು ಪೆವಿಲಿಯನ್ ಸೇರಿದರು.

ಬಳಿಕ ಇಂಗ್ಲೆಂಡ್ ದಾಂಡಿಗರು ಒಂದರ ನಂತರ ಒಂದರಂತೆ ಪೆವಿಲಿಯನ್ ನತ್ತ ಹೆಜ್ಜೆ ಹಾಕಿದರು. ಒಟ್ಟು 147 ರನ್ ಆಗುವಷ್ಟರಲ್ಲಿ ಆಂಗ್ಲರು 6 ವಿಕೆಟ್ ಕಳೆದುಕೊಂಡು ಹೀನಾಯ ಸ್ಥಿತಿಯಲ್ಲಿದ್ದರು. 210ಕ್ಕೆ ಸರ್ವಪತನವಾದ ಇಂಗ್ಲೆಂಡ್, ಕೊಹ್ಲಿ ಪಡೆಯ ಎದುರು ತವರಿನ ನೆಲದಲ್ಲಿ 157 ರನ್ ಗಳ ಸೋಲನ್ನು ಅನುಭವಿಸಿತು.

ಬ್ಯಾಟಿಂಗ್ ನಲ್ಲೂ ಅತ್ಯಾಕರ್ಷವಾಗಿ ಆಡುವ ಮೂಲಕ ತಂಡವನ್ನು ಆಧರಿಸಿದ ಉಮೇಶ್ ಯಾದವ್ ಬೌಲಿಂಗ್ ನಲ್ಲೂ ಮಿಂಚಿ 3 ವಿಕೆಟ್ ಪಡೆದರು.

ಬುಮ್ರಾ 22 ಓವರುಗಳಲ್ಲಿ 9 ಮೈಡನ್ ಓವರ್ ಹಾಗೂ ಕೇವಲ 27 ರನ್ ನೀಡಿ ಶಿಸ್ತುಬದ್ಧ ದಾಳಿಯನ್ನು ಸಂಘಟಿಸಿ 2 ವಿಕೆಟ್ ಪಡೆದರು. ಜಡೇಜಾ, ಠಾಕೂರ್ ತಲಾ 2 ವಿಕೆಟ್ ಪಡೆದರು.

ಭಾರತ ಮೊದಲ ಮತ್ತು ದ್ವಿತೀಯ ಇನ್ನಿಂಗ್ಸ್ ನಲ್ಲಿ 191, 466 ರನ್ ಗಳಿಸಿದರೆ ಇಂಗ್ಲೆಂಡ್ 290, 210 ರನ್ ಗಳಿಸಿತು.

ಶತಕವೀರ ರೋಹಿತ್ ಶರ್ಮಾ ಪಂದ್ಯಶ್ರೇಷ್ಠ ಗೌರವಕ್ಕೆ ಭಾಜನರಾದರು.