ಕೋಟ, ಏ.4: ಇಲ್ಲಿನ ಕೋಟದ ಮೂಡುಗಿಳಿಯಾರಿನ ಹೊನ್ನಾರಿ ಶ್ರೀ ಬೊಬ್ಬರ್ಯ ಮತ್ತು ಪರಿವಾರ ದೈವಸ್ಥಾನ ಇದರ ವಾರ್ಷಿಕ ಹಾಲು ಹಬ್ಬ ಗೆಂಡಸೇವೆ, ಢಕ್ಕೆ ಬಲಿ, ಜಾತ್ರೋತ್ಸವ ಕಾರ್ಯಕ್ರಮ ಸಂಪನ್ನಗೊಂಡಿತು. ಬುಧವಾರ ಹಾಲು ಹಬ್ಬ, ದರ್ಶನ ಸೇವೆ, ಗೆಂಡಸೇವೆ, ಗುರುವಾರ ಢಕ್ಕೆ ಬಲಿ, ತುಲಾಭಾರ, ಬಲಿಸೇವೆ, ಮರು ಪೂಜೆ, ಕೋಟ ಅಮೃತೇಶ್ವರಿ ಮೇಳದವರಿಂದ ಯಕ್ಷಗಾನ ಬಯಲಾಟ ಕಾರ್ಯಕ್ರಮ ನಡೆಯಿತು. ದೈವಸ್ಥಾನದ ಗೆಂಡೋತ್ಸವ ಸೇವಾಕಾರ್ಯದಲ್ಲಿ ಸಾವಿರಾರು ಭಕ್ತರು ಪಾಲ್ಗೊಂಡು ಶ್ರೀ ದೇವರಿಗೆ ಹರಕೆ ಸಲ್ಲಿಸಿದರು. ಧಾರ್ಮಿಕ ವಿಧಿವಿಧಾನಗಳನ್ನು ನಾಗೇಶ ಸೋಮಯಾಜಿ ನೆರವೇರಿಸಿದರು. ಕೋರ್ಗಿ ಸುರೇಶ್ ಪಾತ್ರಿ ದರ್ಶನ ಸೇವೆ ನೆರವೇರಿಸಿದರು. ದೈವಸ್ಥಾನದ ಅಧ್ಯಕ್ಷ ಮಹಾಬಲ ಹೇರ್ಳೆ, ಮೊಕ್ತೇಸರರಾದ ಬೋಜ ಶೆಟ್ಟಿ, ಶ್ರೀಧರ ಶೆಟ್ಟಿ, ಸುಭಾಷ್ ಶೆಟ್ಟಿ, ರತ್ನಾಕರ ಶೆಟ್ಟಿ ಮತ್ತಿತರರು ಇದ್ದರು.