ಸಿದ್ಧಾಪುರ, ಆ.7: ಭಾರತೀಯ ಅಂಚೆ ಇಲಾಖೆಯ ಅಮಾಸೆಬೈಲು ಶಾಖಾ ಅಂಚೆ ಕಛೇರಿಯಲ್ಲಿ 26 ವರ್ಷಗಳ ಕಾಲ ಶಾಖಾ ಅಂಚೆ ಪಾಲಕರಾಗಿ ಸೇವೆ ಸಲ್ಲಿಸಿ ನಿವೃತ್ತಿ ಹೊಂದಿದ ಹರಿಕೃಷ್ಣ ಉಳ್ಳೂರು ಇವರನ್ನು ಶಂಕರನಾರಾಯಣ ಉಪ ಅಂಚೆ ಕಛೇರಿಯಲ್ಲಿ ಸನ್ಮಾನಿಸಿ ಬೀಳ್ಕೊಡಲಾಯಿತು. ಕುಂದಾಪುರ ದಕ್ಷಿಣ ವಿಭಾಗದ ಅಂಚೆ ನಿರೀಕ್ಷಕರಾದ ರಾಮಚಂದ್ರ ಅಧ್ಯಕ್ಷತೆ ವಹಿಸಿ ನಿವೃತ್ತರಿಗೆ ಶುಭ ಹಾರೈಸಿದರು. ಈ ಸಂದರ್ಭದಲ್ಲಿ ಮಚ್ಚಟ್ಟು ಶಾಖಾ ಅಂಚೆ ಕಛೇರಿಯಿಂದ ವರ್ಗಾವಣೆಗೊಂಡಿರುವ ಶುಭವತಿ ಹಾಗೂ ರಟ್ಟಾಡಿ ಅಂಚೆ ಕಛೇರಿಯಿಂದ ವರ್ಗಾವಣೆಗೊಂಡಿರುವ ಪ್ರವೀಣ ಹೆಗ್ಡೆ ಇವರನ್ನು ಗೌರವಿಸಲಾಯಿತು.

ಕಾರ್ಯಕ್ರಮದಲ್ಲಿ ಶಂಕರನಾರಾಯಣ ಅಂಚೆ ಕಛೇರಿ ಸಿಬ್ಬಂದಿ ಹಾಗೂ ಶಾಖಾ ಅಂಚೆ ಕಛೇರಿಯ ಸಿಬ್ಬಂದಿಯವರು ಉಪಸ್ಥಿತರಿದ್ದರು. ಕಾರ್ಯಕ್ರಮವನ್ನು ಶಂಕರನಾರಾಯಣ ಉಪ ಅಂಚೆ ಕಛೇರಿಯ ಅಂಚೆ ಪಾಲಕಿ ಚೇತನಾ ನಿರೂಪಿಸಿದರು. ಗಣಪತಿ ಕಾಮತ್ ಸ್ವಾಗತಿಸಿ, ರಾಮ ಹಾಂಡ ವಂದಿಸಿದರು.