ಪಡುಬಿದ್ರಿ: ಕಾಪು ತಾಲೂಕು ಫಲಿಮಾರು ಗ್ರಾಮದ ಮನೆಯೊಂದಕ್ಕೆ ನುಗ್ಗಿದ ಕಳ್ಳರು ನಗದು ಹಾಗೂ ಚಿನ್ನಾಭರಣ ಕಳವು ಮಾಡಿದ ಘಟನೆ ನಡೆದಿದೆ.

ಬೀಗ ಹಾಕಿ ಬೀಗದ ಕೀಯನ್ನು ಅಲ್ಲೇ ಪಕ್ಕದ ಗೋಡೆಯಲ್ಲಿದ್ದ ಹಲಗೆಯಲ್ಲಿ ಇಟ್ಟು ಪಡುಬಿದ್ರಿಗೆ ಸಾಮಾನು ಖರೀದಿಸಲು ಹೋಗಿ, ತನ್ನ ಅಕ್ಕ ಲತಾಳೊಂದಿಗೆ ವಾಪಾಸ್ಸು ಮನೆಗೆ ಬಂದು ನೋಡಿದಾಗ, ಮನೆಯ ಹಾಲ್ ನಲ್ಲಿ ಇದ್ದ ಕಬ್ಬಿಣದ ಕಪಾಟು ತೆರೆದಿದ್ದು, ಅದರಲ್ಲಿದ್ದ ಸ್ವತ್ತುಗಳು ಚೆಲ್ಲಾಪಿಲ್ಲಿಯಾಗಿವೆ.

ಕಳ್ಳರು ಯಾರೂ ಇಲ್ಲದ ಸಮಯ ಮನೆಯ ಕೀ ಬಳಸಿ ಮನೆಯ ಒಳಗೆ ಹೊಕ್ಕಿ ಕಪಾಟುಗಳ ಬಾಗಿಲುಗಳನ್ನು ತೆರೆದು ಕಪಾಟಿನಲ್ಲಿದ್ದ ರೂ. 10,500 ನಗದು ಹಾಗೂ ರೂ. 75 ಸಾವಿರ ಮೌಲ್ಯದ ಚಿನ್ನಾಭರಣ ಕಳವು ಮಾಡಿದ್ದಾರೆ ಎಂದು ರೋಹಿಣಿ ಎಂಬವರು ದೂರು ನೀಡಿದ್ದಾರೆ. ಪಡುಬಿದ್ರಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.