ಮಂಗಳೂರು, ಅ.18: ಬೆಸೆಂಟ್ ಮಹಿಳಾ ಕಾಲೇಜಿನಲ್ಲಿ ಪ್ರಸಕ್ತ ಸಾಲಿನ ಶೈಕ್ಷಣಿಕ ವರ್ಷ 2023-2024 ರ ವಿದ್ಯಾರ್ಥಿ ಸಂಘದ ಉದ್ಘಾಟನೆಯು ಕಾಲೇಜು ಸಭಾಂಗಣದಲ್ಲಿ ನಡೆಯಿತು. ಕಾರ್ಯಕ್ರಮದ ಮುಖ್ಯ ಅತಿಥಿ ಮಹಾರಾಜ ಹೊಟೇಲಿನ ವ್ಯವಸ್ಥಾಪಕ ನಿರ್ದೇಶಕಿ ಕೋಮಲ್ ಪ್ರಭು ಕಾರ್ಯಕ್ರಮ ಉದ್ಘಾಟಿಸಿದರು. ಬಳಿಕ ಮಾತನಾಡಿದ ಅವರು, ಮಹಿಳೆಯು ಜಗತ್ತಿನ ಒಂದು ಪ್ರಬಲ ಶಕ್ತಿ. ಮಹಿಳೆ ಮನಸ್ಸು ಮಾಡಿದರೆ ಜಗತ್ತಿನಲ್ಲಿ ಏನು ಬೇಕಾದರೂ ಸಾಧಿಸಬಲ್ಲಳು ಎಂದರು.

ಬಳಿಕ ಮಾತನಾಡಿದ ಡಬ್ಲ್ಯು.ಎನ್.ಇ.ಎಸ್. ನ ಆಡಳಿತಾಧಿಕಾರಿ ಪ್ರೊ.ರಾಜಶೇಖರ್ ಹೆಬ್ಬಾರ್, ಬದುಕು ಸಾಧನೆಯ ಹಾದಿಯಾಗಲಿ. ಅವಕಾಶಗಳು ನಮ್ಮನ್ನು ಹುಡುಕಿಕೊಂಡು ಬರುವುದಿಲ್ಲ, ಅವಕಾಶಗಳು ಬಂದಾಗ ನಾವೇ ಅದರ ಬೆನ್ನುಹತ್ತಬೇಕು ಎಂದರು. ಡಬ್ಲ್ಯು. ಎನ್.ಇ.ಎಸ್.ನ ಅಧ್ಯಕ್ಷರಾದ ಮಣೇಲ್ ಅಣ್ಣಪ್ಪ ನಾಯಕ್, ಉಪಾಧ್ಯಕ್ಷರಾದ ಡಾ.ಮಂಜುಳಾ ಕೆ.ಟಿ., ನಿಕಟಪೂರ್ವ ಪ್ರಾಂಶುಪಾಲರಾದ ಡಾ.ಸತೀಶ್ ಕುಮಾರ್ ಶೆಟ್ಟಿ ಪಿ. ಶುಭ ಹಾರೈಸಿದರು.

ಕಾಲೇಜಿನ ಪ್ರಾಂಶುಪಾಲ ಡಾ.ಪ್ರವೀಣ್ ಕುಮಾರ್ ಕೆ.ಸಿ., ವಾಣಿಜ್ಯ ವಿಭಾಗದ ಮುಖ್ಯಸ್ಥರಾದ ಪ್ರೊ.ಸಯ್ಯದ್ ಖಾದರ್, ಅಮುಕ್ತ್ ನ ಅಧ್ಯಕ್ಷರಾದ ಪ್ರೊ.ಗಣೇಶ್ ಪೈ, ಐ.ಕ್ಯೂ.ಎ.ಸಿ ಹಾಗೂ ನ್ಯಾಕ್ ಸಂಚಾಲಕರಾದ ಡಾ.ಸತೀಶ್ ಕೆ., ಡಾ.ಪರಶುರಾಮ್ ಜಿ. ಮಾಳಗೆ, ವಿದ್ಯಾರ್ಥಿ ಸಂಘದ ಸಂಚಾಲಕಿ ಪ್ರೊ. ಶೋಭಿತ ಟಿ.ಎಸ್ ಮತ್ತು ಬೋಧಕ ಬೋಧಕೇತರ ಸಿಬ್ಬಂದಿಗಳು, ವಿದ್ಯಾರ್ಥಿಗಳು ಉಪಸ್ಥಿತರಿದ್ದರು.