ಉಡುಪಿ: ಸೋಮವಾರ ಸಂಜೆ ಉಡುಪಿ ಸಂತೆಕಟ್ಟೆ ರಾಷ್ಟ್ರ‍ೀಯ ಹೆದ್ದಾರಿ ಆಶೀರ್ವಾದ ಥಿಯೇಟರ್ ಬಳಿಯ ಪೆಟ್ರ‍ೋಲ್ ಪಂಪ್ ಹತ್ತಿರ ಪ್ರೇಯಸಿಯನ್ನು ಕೊಂದು ಕುತ್ತಿಗೆ ಕೊಯ್ದುಕೊಂಡು ಆಸ್ಪತ್ರೆಗೆ ದಾಖಲಾದ ಅಲೆವೂರು ರಾಮ್ಪುರ ನಿವಾಸಿ ಸಂದೇಶ್ ಕುಲಾಲ್ (26) ಚಿಕಿತ್ಸೆ ಫಲಕಾರಿಯಾಗದೆ ಮಂಗಳವಾರ ಮುಂಜಾನೆ ಖಾಸಗಿ ಆಸ್ಪತ್ರೆಯಲ್ಲಿ ಸಾವನ್ನಪ್ಪಿದ್ದಾನೆ.

ಸಂತೆಕಟ್ಟೆಯ ರಾಷ್ಟ್ರ‍ೀಕೃತ ಬ್ಯಾಂಕ್ ಒಂದರಲ್ಲಿ ಗುತ್ತಿಗೆ ಆಧಾರದಲ್ಲಿ ಕೆಲಸಕ್ಕೆ ಇದ್ದ ಸೌಮ್ಯಶ್ರೀ (26) ಹಾಗೂ ಉಡುಪಿಯ ಖಾಸಗಿ ಸಂಸ್ಥೆಯಲ್ಲಿ ಉದ್ಯೋಗದಲ್ಲಿದ್ದ ಸಂದೇಶ್ ಕುಲಾಲ್ ಕೆಲವು ವರ್ಷಗಳಿಂದ ಪ್ರೀತಿಸುತ್ತಿದ್ದರು. ಸೌಮ್ಯಶ್ರೀಯವರಿಗೆ ಕೆಲವು ದಿನಗಳ ಹಿಂದೆಯಷ್ಟೇ ಬೇರೊಬ್ಬರ ಜೊತೆಗೆ ನಿಶ್ಚಿತಾರ್ಥವಾಗಿತ್ತು. ಇದರಿಂದ ಕುಪಿತಗೊಂಡಿದ್ದ ಸಂದೇಶ್ ಕುಲಾಲ್ ಸೋಮವಾರ ಸಂಜೆ ಸೌಮ್ಯಶ್ರೀ ಕೆಲಸ ಮುಗಿಸಿ ಮನೆಗೆ ಹೋಗುವುದನ್ನು ಹೊಂಚು ಹಾಕಿ ಕುಳಿತಿದ್ದು ಆಕೆಯನ್ನು ಹಿಂಬಾಲಿಸಿಕೊಂಡು ಆಶೀರ್ವಾದ ಪೆಟ್ರೋಲ್ ಪಂಪ್ ಬಳಿ ಆಕೆಯ ವಾಹನವನ್ನು ಅಡ್ಡಗಟ್ಟಿ ಮನಬಂದಂತೆ ಸೌಮ್ಯಶ್ರೀಗೆ ಇರಿದು ಬಳಿಕ ತಾನೂ ಕತ್ತು ಕೊಯ್ದುಕೊಂಡು ಜೀವನ್ಮರಣ ಸ್ಥಿತಿಯಲ್ಲಿದ್ದ.

ಸೌಮ್ಯಶ್ರೀ ವಿಪರೀತ ರಕ್ತಸ್ರಾವದಿಂದ ಆಸ್ಪತ್ರೆಗೆ ಸಾಗಿಸುವ ದಾರಿ ಮಧ್ಯದಲ್ಲಿ ಮೃತಪಟ್ಟಿದ್ದು, ಸೌಮ್ಯಶ್ರೀಯನ್ನು ಕೊಲೆಮಾಡಿದ ಸಂದೇಶ್ ಕುಲಾಲ್ ಮಂಗಳವಾರ ಮುಂಜಾನೆ ಸಾವನ್ನಪ್ಪಿದ್ದು ಪ್ರೇಮಕಥೆಯು ದುರಂತ ಅಂತ್ಯ ಕಂಡಿದೆ.