ಭೂಮಿ ಅಪ್ಪೆನ ಮಟ್ಟೆಲ್ಡ್ ಉಪ್ಪುನ ಪ್ರತಿಯೊಂಜಿ ಸಂಪತ್ತ್ ಲಾ ಒಂಜತ್ತ್ ಒಂಜಿ ಮಹತ್ವೊ ನ್ ಪಡೆದ್ಂಡ್. ಪೂರಾ ಸೀಕ್ – ಸಂಕಟೊಲೆನ್ ಗುನ ಮಲ್ಪುನ ಮರ್ದ್ ಈ ಪ್ರಕೃತಿಡೇ ಉಂಡು. ಅಯಿಟ್ ಬಚ್ಚಿರೆ-ಬಜ್ಜೆಯಿ ಪನ್ಪಿನವು ಮಸ್ತ್ ಶ್ರೇಷ್ಠವಾಯಿನವು. ಸನಾತನ ಧರ್ಮೊಡು ಒವ್ವೇ ಧಾರ್ಮಿಕ ಕಜ್ಜೊನೇ ಆವಡ್ ಈ ಬಚ್ಚಿರೆ-ಬಜ್ಜೆಯಿ ದಾಂತೆ ನಡಪಂದ್ ಪಂದೇ ಪನೊಲಿ. ಒವ್ವೇ ಪೂಜೆದ ಪೊರ್ತುಡು ಈ ಬಚ್ಚಿರೆ-ಬಜ್ಜೆಯಿನ್ ಸುತ್ತಿಗೆದ ಮನೆಟ್ ದೀಪಿನ‌ ಪದ್ಧತಿ ಉಂಡು.

ತುಡರ್ ಪರ್ಬೊದ ಪೊರ್ತುಡ್ ಬಲೀಂದ್ರ ಲೆಪ್ಪು ಕೊರ್ನಗ ಆವಡ್, ಮದಿಮೆದ ಮಾತಾ ಒಪ್ಪಂದೊಲೆಗ್ ಬಚ್ಚಿರೆ -ಬಜ್ಜೆಯಿಯೇ ಮಲ್ಲ ಸಾಕ್ಷಿಯಾದ್ ಪುಗರ್ತೆ ಪಡೆದ್‌ಡ್. ಇಲ್ಲ್ ಒಕ್ಕೆಲ್ ದ ಪೊರ್ತುಡ್ ಈ ಬಚ್ಚಿರೆ-ಬಜ್ಜೆಯಿನ್ ಪಗಪುನ ಕ್ರಮ ಉಂಡು. ಬೂಲ್ಯ ಕೊರ್ರೆಗಾವಡ್, ಪನವು ಕೊರ್ರೆಗಾವಡ್ ಇಜ್ಜೊ ದಾಲ ಎಡ್ಡೆ ಬೇಲೆ ಸುರು ಮಲ್ಪುನಗ ಕೊಡಿ ಇರೆಟ್ ಅರಿ ತಾರಾಯಿ ದೀದ್ ಐತೊಟ್ಟಿಗೆ ಬಚ್ಚಿರೆ -ಬಜ್ಜೆಯಿ ದೀದ್ ಆನೆ ಮೋನೆದಾಯನ್ ಸುಗಿಪುನ ಕ್ರಮ ಉಂಡು. ಸಾಮಾಜಿಕ, ಸಾಂಸ್ಕೃತಿಕ, ಧಾರ್ಮಿಕ ಬೊಕ್ಕ ಸಾಂಪ್ರದಾಯಿಕವಾದ್ ಬಾಲೆ ತೊಟ್ಟಿಲ್ ಕ್ರಮೊಟ್ ಪತ್ತಿನ ಸಾವುದ ಸಂಸ್ಕಾರ ಕಾರ್ಯೊ ಮುಟ್ಟಲ ಈ ಬಚ್ಚಿರೆ-ಬಜ್ಜೆಯಿ ಮಾನದಿಗೆ ಪಡೆದ್ಂಡ್.

ಈ ಬಚ್ಚಿರೆ-ಬಜ್ಜೆಯಿ ಆಯುರ್ವೇದೊಡ್ಲಾ ಮಸ್ತ್ ಶ್ರೇಷ್ಠವಾಯಿನ ಪುಗರ್ತೆನ್ ಪಡೆದ್ಂಡ್. ಆಯುರ್ವೇದೊಡು ಈ ಬಚ್ಚಿರೆಗ್ ‘ಪಚ್ಚೆ ಬಂಗಾರ್’, ‘ನಾಗವಲ್ಲೀ ‘ ಪಂದ್ ಮಾತ ಪುದರ್ ಉಂಡು. ಬಜ್ಜೆಯಿ ಗ್ ಪೂಗೀಫಲ ಪಂದ್ ಪುದರ್. ನೆಟ್ಟ್ ವಾಯಿ-ವಿರೋಧಿ ಲಕ್ಷಣ ಉಪ್ಪುನೆರ್ದಾವರ ಉಂದೆನ್ ತಿನ್ಪಿನೆರ್ದ್ ಜೀರ್ಣಕ್ರಿಯೆ ಸಮೊಟ್ ಆಪುಂಡ್. ಅಂಚ ದುಂಬುದಕ್ಲು ವನಸ್ ಆಯಿಬೊಕ್ಕ ಈ ಬಚ್ಚಿರೆ-ಬಜ್ಜೆಯಿನ್ ತಿನೊಂದಿತ್ತೆರ್. ಜೊರ, ಕಫ, ತೆಮ್ಮೊಗ್ ಮರ್ದ್ ಆಯಿನ ಈ ಬಚ್ಚಿರೆಗ್ ಬಾಯಿಡ್ ಲಾಲಾ ರಸೊನ್ ಉತ್ಪತ್ತಿ ಮಲ್ಪುನ ಸಗ್ತಿ ಲಾ ಉಂಡು. ಗ್ಯಾಸ್ಟ್ರಿಕ್, ಬಂಜಿ ಉಬ್ಬೇರ್ನು, ಕಕ್ಕುನೆಕ್ಕ್ ಮಾತ ಬಚ್ಚಿರೆಗ್ ಓಮ ಬೊಕ್ಕ ಉಪ್ಪುನ್‌ ಪಾಡುದ್ ತಿಂಡ ಈ ಸಮಸ್ಯೆ ದೂರಾಪುಂಡ್ ಪಂದ್ ಹಿರಿಯೆರ್ ಪಂತಿನವು. ನರಕೋಶನು ಉತ್ತೇಜನ ಮಲ್ಪುನ ಶಕ್ತಿದ ಒಟ್ಟುಗೇ ಬಾಯಿದ ಗಾಯೊಲೆನ್ ಗುನ ಮಲ್ಪುನ‌ ಸಗ್ತಿ ನೆಕ್ಕ್ ಉಂಡು. ಆತೇ ಅತ್ತಾಂದೆ ಈ ಬಚ್ಚಿರೆದ ಮಿತ್ತ್ ಅಂಜನ ಪಾಡ್ದ್ ಭವಿಷ್ಯಲ ಪನ್ಪೆರ್.

ಇಂಚ ನರಮಾನ್ಯನ ಪುಟ್ಟುರ್ದು ಕಡೆ ಮುಟ್ಟಲ ಈ ಬಚ್ಚಿರೆ- ಬಜ್ಜೆಯಿ ಪನ್ಪಿನವು ಮಸ್ತ್ ಮಲ್ಲ ಮಹತ್ವೊನ್ ಪಡೆದ್ಂಡ್ ಪಂದೇ ಪನೋಲಿ.

-ಶ್ರಾವ್ಯಾ ಆಚಾರ್ಯ